'S Marterl an der Kirchturmmauer

'S Marterl an der Kirchturmmauer

(mit Dank an Harald Grill für die Idee)


A uroids Marterl hob i neilich gseng -
a Buidl, Doudnkepf und kroazde Boana -
an unserm Kirchturm - und des is koa gloaner.
Do is vor langer Zeid a Unglick gscheng:

Beim Resdauriern vom Turm sann d' Aufzugschdräng
obgrissn und desweng is damois oaner -
"elendiglich" schdähd dort - aufd Pflasterschdoana
"zu Tode" owergschdirzt aus häxter Häng.

Do bin i dann doch arg ins Denga kemma:
Hoch nauswoin hoaßt hoid oft: se iwernemma.
Wer wia a Kirchturm nauf inn Himme schdrebd,
irrd aa vialeicht - säibst wenner's iwerlebd:

Der damois is vuimehr noch unten gschdirzt:
grod dees hod eahm den Weg noch drom verkirzt.