De oide Glosterkiacha

De oide Glosterkiacha

(aus de Häglwerther Säsoneddl)


Koid is's und feichd, de oide Glosterkiacha.
An Zuagang schbarrd a Gidder, schwarz und schwaar,
ois ob der Mensch am Herrgod lästig waar.
A gloaner Kastn neem der Dier, a schiacher,

biet Ansichtskartn o und zwoa, drei Biacher.
Bloß wem? Koa Mensch is do; de Kiach is laar.
Auf am Plakat schdäht: näxts Johr, Januar,
is a Konzert. Do derf's dann andersd riacha ...

A Text mit oide Foddos informierd:
vor vierzg Johr hamms de Kiacha restaurierd.
Do hods no irger ausgschaud. - Bei der Dier,

vorm Nausgeh, konnst zwecks Nachlaß deiner Sindn
a Kerzl fier a Fuchzgerl o dir zindn.
Na guad, i schdäi oans hi. Ma woaß ja nia ...