Der Weihnachdsrieß

D' Wohnzimmerdier is zuagschberd! Iatz woaßt gwieß:
wenns aufgähd, schdroid der Baam im Kerzenschimmer -
und daß, obwoisd a Gribbe warst wia immer,
's Griskindl doch aa heier kemma is.

Weihnachdn is fier Kinder 's Paradies.
Bloß: irgendwann, do bist koa Kind hoid nimmer.
Und von do o gschbierst bloß no, oi Johr schlimmer,
an Heiligohmd im Herzn drin an Rieß.

Sann's andre Kerzen? Is's a andrer Baam?
Naa - du bist anderschd! Du konnst nimmer glaam.

Weilsd sixt, daß d' Weihnachdsbodschafd gor ned schdimmd:
Koan Frieden und koa Liab gibds auf der Wäid.
Und weilsd inzwischen woaßt, daß, wo koa Gäid
ned wohnd, dohi aa 's Griskindl ned kimmd.