Wenn der Gickerl grahd

Wenn der Gickerl grahd

(in memoriam M. Eglseder, 1914 - 2012)


Schwarz is 's Wasser, diaf und schdaad.
De boor Wäijerl merkd ma kaam,
wenn der Hiagstwind von am Baam
diam a Bladl einewahd.

Ob der Mensch verzweifen daad
ohne Auferschdehungsglaam?
'S Leem is nix, hoaßt's, wiara Draam.
Wach werst, wenn der Gickerl grahd.

Ja, der Hiagstwind, der is schdreng.
Nix ko 's Bladl doa dageng.

Und sei Baam? Wer hod den gsaad?
Wer laßt Baama Bladln dreim,
wenn zletzt doch koa hengableim?

Schwarz is 's Wasser, diaf und schdaad.