De Dichterlaum vom Sonnenheim

Jeds Johr im Sommer an am Wochnend,
do kemman de boor säitna Vögl wieder
und lassn aufm Sonnenheim se nieder -
net aufm Hausdoch, wia mers sonst woi kennt:

naa, in der Laum drin nistns konsegwent
und essn, tringan, putzn eahna Gfieder
und schnowen gscheid daher. Sonst sanns net zwider.
De Laum hamms eahna "Dichterlaube" gnennt.

No ja, so ganz dicht kennans woi net sei,
de "Dichter", weil sonst passert sovui Wei
und sovui Essen gor net in sie nei ...

Sie taatn gern jeds Johr no länger bleim -
bloß kaamans dann vor Feiern net zum Schreim.
"Mir seng uns: in der Laum vom Sonnenheim!"