Der Bademoaster

Der Bademoaster

(aus de Häglwerther Säsoneddl)


Vo fria bis schbäd a oanzigs Kindergschroa
und Menschngwurl. Den ganzn Dog lang roaster
im Sommer hi und her, der Bademoaster,
muaß Aung hom hint und vorn und hiat sei Gmoa.

Und dann, auf oamoi, iser ganz alloa.
Jäds Johr dersäiwe Grund: Hiagstofang hoaßter.
Na liegd vor eahm a Rasn, a verwoaster,
a laarer Sä und er hod nix zum doa.

Saubläd! Do derfst de oamoi fast derrenna,
kimmst ned zum Schaun, und 's andermoi host Zeid
grod gnua - und merkst, daß dees di aa ned gfreid.
Do dro wos reguliern, dees soit ma kenna!

Weil's letzdlich ja mim ganzn Leem so gähd:
Zerschd werglst wia ned gscheid - dann schaust rechd bläd.