Hasters ghört?

Hasters ghört? War des net wiar a Glöckerl?
Ganz weit weg, aber hell, voller Freid!
Eppers klingt in de tanzenden Flöckerl,
de in Weiß alles huin weit und breit...

Hasters gseng? War des net wiar a Löckerl
von am Engerl, des ghuscht is durch d' Leit?
Grad als fürchtert ser si no a Bröckerl
da herunt, wo d' Leit wurln wia net gscheit.

Hasters gschmeckt? Bis ins hinterste Eckerl
hat's nach Plätzerl im Haus grochen heit!
Und mit Packerl füllt d' Muater 's Versteckerl!
Du, bald is's, glaub i, wieder soweit!