Säbanorama

Säbanorama

(aus de Häglwerther Säsoneddl)


Schaug hi: do druntn liegder, mit seim Woid
am Ufer und de Berg im Hintergrund:
der Häglwerther Sä. De Wiesn und
daneem des Gloster: is dees ned wia gmoid?

Neinhunderd Johr fast is des Gloster oid.
Scho damois war de Luft am Sä so gsund.
Zwar is er kloa, so daßd in oaner Schdund
rundumgähst, doch grod dees is, wos mir gfoid.

Naa, no vui besser gfoid mer - weil dees heid
so säitn is an so am scheena Fleckerl:

Es schdähd no koa Hoddäi an jädm Eckerl,
du werst derdreen ned von am Haufa Leid
und d' Hinweisschuidl sann in Deitsch no gschriem,
ned Englisch. Is dees ned scho fast inddiem?