De moderne Glostersuppn

De moderne Glostersuppn

(aus de Häglwerther Säsoneddl)


'S Leem friarer, hoaßts, war no a gräß're Blog.
Vui Leid hamm darbt. Und drum hamm aus Derbarma
mid aner Glostersuppn, aner warma,
de Mönch sie gschbeist z' Middog zum Glocknschlog.

Sann mir dadsächlich weider heidzudog?
"Sozialfürsorge!" - Huifts wos? Mir erfahrmer
bloß ned, daß's oiwei mehrer wern, de Arma,
weil koa Bolliddicker dees zuageem mog.

"Harz-Vier glangd leicht zum Existiern!" Wos fluachan
dann dee aso, de d' Abfoikärb durchsuachan?
Und bei der "Dofe" schdengans scharenweis
um Epfe o, de hoiwert scho derfeid sann.

Dees is der Gsäischafdszuaschdand, wo mer heid sann:
Milljonenschiaber do, do Armenschbeis.