Schdurmschoon

Schdurmschoon

(aus de Häglwerther Säsoneddl)


Schaug hi: do hod der Schdurm an Ast obbrocha!
Auf oamoi glaffd im Baam a diafe Wundn.
Kabutt wos macha, des gähd in Sekundn;
es brauchd bloß vui gnua Gwoid. A Menschnknocha,

der kamad hoid in Gips fier fünf, sechs Wocha;
fier Baam is so a Gips no ned erfundn.
Und wererd eahm der Ast aa zurebundn:
es nutzerd nix. Der Schdurm hods Urteil gschbrocha.

Ja: gschbrocha, gsagd is so a Machtwort gschwind.
Wia schnäi werd aus am Lifterl glei a Wind!
Und wenn uns, wos mir gschdürmd und gwederd hamm,
aa no so reid danoch: es is bassierd.

Koa Baam woaß, wos an Schdurmschoon rebbarierd.
Es gibd so Brich, de wachsen nimmer zamm.