Wenn a Weder kimmd

Wenn a Weder kimmd

(aus de Häglwerther Säsoneddl)


Wenn iwern Berg a Weder ummerziagd,
schaun d' Leid, daß's einekemman gschwind ins Haus.
Mi aber dreibd's erschd rechd mit Gwoid dann naus,
ois häd i no im Leem gnua Grach ned griagd.

Grod schee is's, wenn im Wind der Schdaub auffliagd
und durch de Baam im Dorf gähd a Gebraus.
Der Himme schaud wia iwerkocherd aus.
Und wia der Schdurm am Berg de Baam scho biagd!

Der Sä wirfd houe Wäin vor Ungeduid;
er gschbierd den Reng, der kimmd, und gfreid se drauf.
Der Glosterkiachturm deit zum Himme nauf:
"Wenn de der Bliz schdroafd, Mensch, bist säiwer schuid!"

Ko sei, daß i im Schdurm mim Herrgod red ...
Derschlong hod mi sei Bliz bis heid no ned.