S Frühlingsgfui

Schaugts auße: Frühling is's - und Zeit is's worn!
Zeit, daß der Himme endlich wieder blau is,
daß auf de Autobahnen wieder Stau is.
Den Winter hammer uns gnua obegfrorn.

Habts ned aa ihr scho de Geduid verlorn?
Driabsinnig werst, wenn's oiwei grau in grau is.
Jetz zwitschert's wieder draußd und a Radau is,
ois waar de ganze Wäid wia neigeborn.

Apropo nei: oan Vorteil hod des koide
Sauweder ghabt: Do gibt's a Ruah, mei Oide.
Jetz aber nimmt's me wieder frisch aufs Korn:

"Mei schau, wia's schee is draußd, wia d Bleamerl bliahn!
Jetz reißt di zamm und gehst mit mir spaziern!"
Fangt der Schmarrn aa hoid wieder o vo vorn...