'S Freischwimma

'S Freischwimma

(aus de Häglwerther Säsoneddl)


Fier Kinder gibds im Sä a extrigs Beckn,
mit Laddn ohzeind, daß koans außeschwimmd.
Do blandschns a boor Johr, dann aber kimmd
der Sommer, do woins naus aus derer Eckn.

Dann, moanans, hamms aa Krafd fier greß're Schdreckn.
Mim Vadda zamm werd d' Muadda iwerschdimmd.
"Huif, Herrgod, daß mei Kind koan Schohn ned nimmd!",
bet' d' Mamma draußd am Ufer, blaß vor Schreckn.

"Ned so weid nei!", schreids aufgregd ihrerm Mo.
Der lachd: "Der Bangerd schwimmd mer ja davo!" -
So gengan hoid de Gang, so is's der Brauch:
de Jugend scheichd koa Gfahr und schwimmd se frei ...

Mim Oidwern schwindt de Gfahr von säiwer, wei
dann Reddungsring oam waxn um an Bauch.