Mei Kiacha

Mei Kiacha

(aus de Häglwerther Säsoneddl)


I dua mi schwaar mim Glaam, i sogs ganz ehrlich,
sooft i so a Kiach sieg voller Prachd.
I moan oiwei, do häd der Herrgod glachd.
Eahm war der Luxus seinerzeid entbehrlich.

I hob hoid oiß, wos gäidig, brotzerd, herrlich,
a Theadder is, vo Haus aus in Verdachd.
Der Mensch bloß demonschdrierd gern Gäid und Machd;
der Herrgod brauchd a so a Blendwerk schwerlich.

Mei Gfui, daß i am Berg, im Woid, am Sä,
in Reng und Schdurm am Herrgod näher schdäh
ois do herin, mog foisch sei, ja gor gfährlich -

i bin koa Theolog und Schriftgelehrter.
Mei Kiacha is der Sä, der Häglwerther:
do foids mer leichter, 's Glaam, i sogs ganz ehrlich.